Fagna byltingarafmæli með því að boða til mótmæla

Ár er liðið frá því Hosni Mubarak, forseti Egyptalands, hrökklaðist frá völdum eftir mótmæli Egypta á Frelsistorginu í Kaíró.

Til þess að fagna byltingarafmælinu hafa aðgerðarsinnar boðað mótmæli og hvatt Egypta til þess að sýna af sér borgaralega óhlýðni. Ástæðan er sívaxandi reiði almennings út í herinn sem fer með völdin í landinu þrátt fyrir að kosningum sé lokið. Það var stjórnmálaflokkur Bræðralags múslima sem vann stórsigur í síðustu kosningum en þeir eru mótfallnir mótmælunum.

Egypskir fjölmiðlar greina frá því að aðgerðarsinnar undibúi núna verkföll bæði á vinnustöðum og í háskólum landsins. Mikil reiði er einnig á meðal almennings eftir að 74 létust á fótboltaleik í borginni Port Said í janúar. Hernum er meðal annars kennt um það hvernig fór.