Átta handteknir fyrir að slátra villtum dýrum

Lögreglan í Bangkok í Tælandi handtók átta manns fyrir að slátra villtum dýrum. Í raun var um slembilukku að ræða en lögreglan sá mann í Norðausturhluta borgarinnar koma út úr verslun með blóðugar hendur.

Maðurinn hafði farið að kaupa búnað til þess að slátra dýrunum. Lögreglan elti manninn í heimahús en í kjallaranum fann lögreglan ólöglegt sláturhús þar sem mennirnir höfðu slátrað Bengal tígrisdýri, sebradýrum, krókódílum og flóðhestum auk annarra dýra.

Um fjögur hundruð kíló af kjöti fundust í ólöglega sláturhúsinu og voru átta menn handteknir í kjölfarið samkvæmt breska vefmiðlinum Daily Telegraph.

Handtökurnar hafa svipt hulunni af gríðarlega stórum en ólöglegum iðnaði þar sem villtum dýrum er slátrað og kjötið selt veitingahúsum víða í Tælandi. Talið er að viðskipti af þessum toga velti um tíu milljörðum dollara ár hvert.