Apple boðar úttekt á vinnuaðstæðum í Kína

Tæknifyrirtækið Apple hefur ákveðið að opna verksmiðjur sínar í Kína fyrir skoðun. Mannréttindasamtök munu á næstu dögum rannsaka verksmiðjur fyrirtækisins Foxconn en það annast framleiðslu á vörum Apple.

Herferðinni var hrundið af stað eftir að 150 starfsmenn Foxconn hótuðu að svipta sig lífi. Verkamennirnir kvörtuðu yfir lágum launum og slæmum vinnuaðstæðum. Þeir hótuðu að stökkva fram af verksmiðju Foxconn í Wuhan-héraði í Kína.

Síðustu ár hefur Apple verið harðlega gagnrýnt fyrir vinnuaðstæður í Kína. Í dag var síðan úttekt boðuð á vinnuaðstæðum í verksmiðjum Foxconn. Mannréttindasamtökin Fair Labor Association munu sjá um rannsóknina.

Foxconn er stærsti raftækjaframleiðandi veraldar og eru starfsmenn fyrirtækisins um 400.000. Stærstu verksmiðjur Foxconn eru í Shenzhen og Chengdu í Kína.