Kraftaverkastúlka var á kafi í snjó tímunum saman

Fimm ára stúlku var bjargað í gær eftir að heimili hennar varð fyrir snjóflóði í Kosóvó. Fjölskylda stúlkunnar lést í snjóflóðinu en hún var grafin í snjó í tæpar tíu klukkustundir.

Björgunarmenn höfðu leitað Asmiru Reka tímunum saman áður en þeir heyrðu rödd hennar. Þeir þurftu að grafa sig í gegnum rúma tíu metra af snjó áður en þeir komu auga á hana.

Teppi var vafið utanum Asmiru og hún flutt á spítala. Læknar segja að hún muni ná fullum bata.

Talið er að níu hafi látist þegar snjóflóðið skall á húsinu - öll voru skyldmenni Asmiru. Foreldrar hennar létust einnig í snjóflóðinu.