Enn hitnar í kolunum í deilunni um Falklandseyjar

Enn hitnar í kolunum í endurvakinni deilu Argentínumanna og Breta um Falklandseyjar. Nú hefur verkalýðsfélag flutningsmanna í Argentínu ákveðið að sniðganga öll bresk skip sem koma til hafnar í Argentínu en hafnarverkamenn í landinu tilheyra þessu verkalýðsfélagi.

Í frétt um málið á BBC segir að afleiðingar af þessari ákvörðun séu óljósar. Spennan í samskiptum þjóðanna vegna Falklandseyja hefur farið stigvaxandi á undanförnum vikum og mánuðum og kemur til kasta Sameinuðu þjóðanna á næstunni. Eins og fram hefur komið í fréttum ætla Argentínumenn að kvarta til Sameinuðu þjóðanna undan því sem þeir kalla hervæðingu Breta á hafsvæðinu kringum eyjarnar.