Býr í flugstöðinni

Þýskur karlmaður hefur búið í sænskri flugstöð í tvo mánuði. Hann segist ekki vilja fara aftur heim til Þýskalands en hann hafi engan stað til að búa á í Svíþjóð.

„Ég skammast mín. Ég hef ekki lifað góðu lífi og nú hef ég engan stað til að vera á," segir maðurinn í samtali við Aftonbladet. Þegar maðurinn, sem er tuttugu og sjö ára, dúkkaði upp í flugstöðinni fyrir tveimur mánuðum síðan var hann einungis með eina ferðatösku og vegabréf. Málið þykir furðulegt í alla staði.

Hann hefur nú komið sér fyrir inni í flugstöðinni en hann segist ekki eiga neinn pening. Hann fær þó annað slagið mat frá einu af kaffihúsunum á vellinum. Á daginn er hann á meðal fólks en á kvöldin fer hann inn í bænaherbergi og sefur þar. Blaðið segir að á daginn fari hann stundum í miðborg borgarinnar, en hann snýr alltaf aftur.

Einhverjir velta því kannski fyrir sér hvers vegna lögreglan gerir ekkert í málinu. En lögreglumenn segja að það sé ekki á dagskrá að vísa honum burt.

„Fólk vorkennir honum. Hann er ekki til vandræða í raun kemur honum vel saman við aðra ferðalanga hér á flugvellinum," segir yfirmaður landamæralögreglunnar á flugvellinum. „Við ætlum að sjá til. Fyrr eða síðar mun hann örugglega yfirgefa flugvöllinn. Hann hlýtur að verða þreyttur á að vera hér. Það getur ekki verið gaman til lengdar."

Lögreglan vinnur nú að því, í samráði við kirkjuna og þýska sendiráðið, að veita honum þá hjálp sem hann þarf.