Rússar voru hársbreidd frá kjarnorkuslysi á stærð við Tjernobyl

Ekki munaði nema hársbreidd að kjarnorkuslys á stærð við Tjernobyl yrði í Rússlandi í desember síðastliðnum þegar eldur kom upp í kjarnorkukafbát þar sem hann var til viðgerðar í skipasmíðastöð í Murmansk.

Eldur varð laus í kafbátnum þegar unnið var við rafsuðu í honum. Það tók allt tiltækt slökkvilið yfir sólarhring að ráða niðurlögum eldsins en um tíma stóðu eldtungurnar um 10 metra upp í loftið. Grípa varð til þess ráðs að sökkva kafbátnum að hluta til að ráða niðurlögum eldsins.

Rússnesk stjórnvöld sögðu á sínum tíma að fyrir löngu hefði verið búið að fjarlægja öll kjarnorkuvopn úr kafbátnum áður en eldsins varð vart og því ekki mikil hætta á ferðum.

Rannsóknarblaðamenn við tímaritið Vlast hafa komist að því að þetta voru hreinar lygar hjá stjórnvöldum. Um borð í kafbátnum voru 16 ICBM eldflaugar sem hægt er að skjóta á milli heimsálfa. Hver þeirra um sig var með fjórar kjarnorkusprengjur innanborðs. Þar að auki var kafbáturinn, sem er yfir 18.000 tonn að stærð og knúinn tveimur kjarnorkuaflvélum, fullhlaðinn af tundurskeytum og duflum.

Í tímaritinu segir að ef eldurinn hefði náð að sprengja eitt af þessum tundurskeytum hefði ekki þurft að spyrja að leikslokum.