Norðmenn þróa nýtt lyf gegn HIV veirunni

Norska lyfjafyrirtækið Bionor Pharmas hefur unnið að þróun á nýju lyfi gegn HIV veirunni en prófanir á lyfinu sýna að það kemur í veg fyrir að HIV smit þróist yfir í eyðni.

Lyfið sem ber heitið Vacc-4x dregur úr magni HIV veira í líkamanum og þar að auki sýna prófanir að lyfið hefur mun minni aukaverkanir í för með sér en önnur sambærileg HIV-lyf. Auk þess segja talsmenn Bionor að lyfið muni verða mun ódýrara en sambærileg lyf þegar það kemur á markaðinn.

Reiknað er með að Vacc-4x komi á markaðinn árið 2015 ef allt gengur að óskum hjá Bionor en framundan eru prófanir á því í Bandaríkjunum í samstarfi við Matar- og lyfjastofnunina þar í landi.

Bionor er einnig að þróa annað lyf gegn HIV samhliða Vacc-4x en þessi tvö lyf saman gætu valdið byltingarkenndum breytingum á meðhöndlun HIV sjúklinga, að því er segir í tilkynningu frá Bionor.

Bionor Pharmas er skráð félag í kauphöllinni í Osló. Félagið tilkynnti um árangur sinn af prófunum á Vacc-4x í morgun og síðan þá hafa hlutabréf þess hækkað um tæplega 50%.