Chicago er spilltasta borgin í Bandaríkjunum

Ný rannsókn leiðir í ljós að Chicago er spilltasta borgin í Bandaríkjunum og Illiois ríkis sem borgin tilheyrir er eitt spilltasta ríki í Bandaríkjunum.

Rannsókn þessi var unnin af Dick Simpson prófessor í stjórnmálafræði við Illinois háskólann. Hann telur að spilling meðal kjörinna fulltrúa, embættismanna og annarra starfsmanna borgarinnar kosti um 500 milljónir dollara eða um 60 milljarða króna á hverju ári.

Spilling á sér langa sögu í Chicago en fyrstu réttarhöldin vegna spillingar í borginni áttu sér stað árið 1869. Frá árinu 1976 hefur verið dæmt í rúmlega 1.500 spillingarmálum í borginni. Næst á eftir kemur Los Angeles þar sem dæmt hefur verið í rúmlega 1.200 spillingarmálum á sama tímabili.

Staðan er litlu betri í Illinois ríki en Simpson bendir á að fjórir af síðustu sjö ríkisstjórum Illinois hafi verið dæmdir fyrir spillingu í starfi. Hið sama gildi raunar um tugi kjörinna borgarfulltrúa í Chicago en Simpson segir að þriðjungur allra borgarfulltrúa frá árinu 1973 hafi verið spilltir í störfum sínum.