Kevin Costner flytur ræðu í jarðarför Houstons

Leikarinn Kevin Costner mun flytja ræðu í jarðarför Whitney Houston. Þau léku saman í kvikmyndinni The Bodyguard frá árinu 1992.

Fjölskylda Houstons greindi frá þessu í dag. Þá munu Aretha Franklin og Stevie Wonder syngja í útförinni. Einnig mun tónlistarframleiðandinn Clive Davis halda ræðu en hann er sagður hafa komið Houston á kortið á sínum tíma.

Jarðarförin mun fara fram á laugardaginn næstkomandi. Hún verður haldin í sömu kirkju og Houston söng í sem barn. Whitney fannst látin á hótelherbergi sínu í Beverly Hills um síðustu helgi.

Kevin Costner, sem nú er 57 ára gamall, lék aðalhlutverk kvikmyndarinnar The Bodyguard. Þar var hann í hlutverki leyniþjónustumanns sem fær það verkefni að vernda heimsfræga söngkonu sem leikin var af Whitney Houston. Persóna Costners verður á endanum ástfangin af söngkonunni. Houston söng lagið „I Will Always Love You" eftir Dolly Parton í kvikmyndinni.

The Bodyguard naut gríðarlegra vinsælda þegar hún kom út árið 1992 og þénaði rúmlega 400 milljónir dollara.

Hér að ofan má sjá brot úr kvikmyndinni.