Fundu sjaldgæfa gullpeninga frá tímum Kristjáns 4.

Þrír mjög sjaldgæfir gullpeningar frá upphafi 17. aldar hafa fundist við Esrum klaustrið á Norður-Sjálandi. Talið er að þeir hafi verið í eigu Kristjáns 4. Danakonungs.

Gullpeningar þessir, sem eru aðeins stærri en dönsk 10 króna mynt, voru mjög verðmætir á sinni tíð og eingöngu notaðir í alþjóðaviðskiptum eins og þegar konungar þurftu að leigja sér hermenn eða málaliða frá öðrum löndum. Því er hugsanlegt að þeir hafi fallið úr vasa konungsins.

Kristján 4. var einn ástsælasti konungur í sögu Danmerkur. Hann er jafnframt sá sem ríkt hefur lengst í landinu eða samfellt í 59 ár frá því hann var krýndur árið 1588. Hans er minnst fyrir ýmsar framsæknar endurbætur á dönsku samfélagi sem og fallegar byggingar sem enn standa í Kaupmannahöfn. Meðal þeirra má nefna Sívalaturninn og Kauphöllina.

Þá endurbyggði hann borgina Osló eftir að bruni eyddi henni árið 1624. Þá hét sú borg raunar Christiania.

Kristján átti í ýmsum stríðum á sínum ferli eins og venjan var í Evrópu á þessum tíma. Lengst af barðist hann við Svía, gekk vel framan af en fór síðan halloka fyrir þeim undir lok ferils síns.