73 látnir eftir óeirðir á fótboltaleik

73 létust þegar átök brutust út meðal aðdáenda á fótboltaleik í Egyptalandi í dag. Rúmlega 150 slösuðust og er talið að tala látinna eigi eftir að hækka.

Fólkið lést eftir að aðdáendur tveggja fótboltaliða réðust inn á völlinn. Samkvæmt fréttamiðlum í Egyptalandi voru margir þeirra vopnaðir hnífum.

Sjónvarpsstöð náði myndum af atvikinu. Fjöldi fólks sést þar hlaupa inn á völlinn og elta bæði leikmenn og aðra aðdáendur. Nokkrir létust í áhorfendastúkum eftir að kveikt hafði verið í þeim.

Egypskir fótbolta stuðningsmenn eru alræmdir fyrir ofbeldi - þá sérstaklega áhangendur félagsliðsins Ahly eða „The Ultras."