Bretar senda eitt öflugasta herskip sitt til Falklandseyja

Spennan mili Bretlands og Argentínu vegna Falklandseyja fer stigvaxandi. Bretar hafa ákveðið að senda eitt öflugasta og fullkomnasta herskip sitt til Falklandseyja.

Um er að ræða tundurspillinn HMS Dauntless. Um borð í skipinu er nægilegt magn af eldflaugum til að eyða ekki bara orrustuþotuflota Argentínu í heild sinni heldur einnig flugflota allra nærliggjandi ríkja.

Um borð í Dauntless eru þar að auki öll fullkomnustu tölvuskýrðu varnarkerfi sem til eru í heiminum. Engar orrustuþotur eiga minnstu möguleika á skjóta eldflaug að skipinu án þess að hún sé sprengd í loft upp áður en hún nær kílómetra að skotmarkinu. Hið sama gildir um allar eldflaugar sem skotið er beint á Dauntless frá landi.

Deilur Breta og Argentínumanna um Falklandseyjar hafa verið langvarandi. Þær voru þó í kyrrstöðu þar til breskt olíufélag tilkynnti nýlega að það væri byrjað að bora eftir olíu undan ströndum eyjanna.