Dönsk fegurðardrottning fyrir norskan hæstarétt

Norski bærinn Sandefjord hefur ákveðið að áfrýja til hæstaréttar landsins máli sem bærinn tapaði í héraðsdómi gegn dönsku fegurðardrottningunni Linu Kruuse Nilsen.

Fegurðardrottningin fór í mál gegn Sandefjord vegna skaða sem hún hlaut þar í desember árið 2008 þegar hún féll á svelli við torg bæjarins er hún var á leið á líkamsræktarstöð.

Line sem var kjörin ungfrú Danmörk árið 2007 hefur ekkert getað unnið eftir slysið vegna taugaskaða og þrálátra verkja í mjöðm og hnakka. Line taldi að bæjarfélagið bæri ábyrgð á skaða sínum þar sem torgið hafði ekki verið saltað þrátt fyrir að það væri glerhált. Þessu var héraðsdómurinn í Sandefjord sammála.

Bæjaryfirvöld í Sandefjord eru hinsvegar ekki sammála héraðsdóminum og hafa því ákveðið að vísa málinu til hæstaréttar.