Reyndi að ræna stúlku í stórmarkaði

Öryggismyndavélar í Wal Mart búð í Georgia í Bandaríkjunum festu í gær á filmu það sem virðist vera mannránstilraun. Í myndskeiðinu sést hvernig maður grípur sjö ára gamla telpu og reynir að nema hana á brott. Stelpan, Britney Baxter, barðist hinsvegar um á hæl og hnakka og öskraði af lífs og sálar kröftum.

Ræninginn flúði þegar hann sá að Britney ætlaði ekki að gefast upp baráttulaust. Þegar lögreglan mætti á svæðið var hægt að sjá bílnúmer mannsins í öryggismyndavélinni og var hann handtekinn. Í ljós kom að um var að ræða 25 ára gamlan mann sem er á reynslulausn vegna manndráps.