NASA boðar byltingu í læknisvísindum

Vísindamenn hjá NASA opinberuðu í síðustu viku byltingarkennda tækni sem getur meðhöndlað sjúkdóma og kvilla án þess að sjúklingurinn sé þess var.

Það var vísindamaðurinn Dr. David Loftus sem þróaði tæknina. Loftus hefur um árabil unnið að þróun nokkurs konar heilbrigðisgæslu fyrir geimfara. Hið svokallaða „NASA Biocapsule" er lokaafurð þessarar rannsóknarvinnu.

Hylkið er gert úr samsettum kolrörum. Því er komið fyrir í húð geimfaranna og fylgist með lífsmörkum og framkvæmir sjúkdómsgreiningu reglulega. Hylkið getur síðan meðhöndlað fjölda kvilla með því að sleppa viðeigandi lyfjum út í blóðrásina.

Hylkið var upphaflega hannað fyrir geimfara sem koma til með að ferðast í geimferjum svo árum skiptir. En hylkið er einnig hægt að nota á Jörðu niðri. Þannig mun hylkið sjá líkömum sykursjúkra fyrir insúlíni og sjá um geislameðferð krabbameinssjúklinga.

Dr. Loftus tekur þó fram að nokkur ár séu í það að hylkið verði tekið í notkun. Hægt er að sjá kynningu NASA hér að ofan.