Sjómaðurinn var í þrjár og hálfa klukkustund í sjónum

Íslenski sjómaðurinn, sem var bjargað úr Noregshafi í gærdag, var búinn að vera í þrjár og hálfa klukkustund í sjónum þegar þyrla norsku gæslunnar fann hann. Maðurinn var vel búinn enda komst hann í flotbúning áður en togarinn Hallgrímur SI-77 sökk í gærdag.

Landhelgisgæslunni, bæði í Noregi og á Íslandi, barst neyðarkall frá skipinu skömmu fyrir hálf tvö í gærdag. Svo virðist sem skipið hafi sokkið snögglega. Sá sem lifði af horfði á eftir tveimur félögum sínum hverfa í hafið. Sá þriðji sem lést, komst í lekan flotgalla og er það líklega ástæðan fyrir því að hann drukknaði.

Það var ekki fyrr en rúmlega fimm síðdegis í gær, sem áhöfn þyrlu norsku landhelgisgæslunnar fann manninn á lífi. Skömmu síðar fannst mannlaus björgunarbátur á svæðinu.

Leit var svo hætt á tíunda tímanum í gærkvöldi vegna óveðurs. Fárviðri geisaði á svæðinu og ölduhæð fór í fimmtán metra þegar verst lét.

Togarinn var smíðaður árið 1974. Hann var í eigu útgerðarfélags á Siglufirði. Skipið hafði verið selt í brotjárn í Noregi og var því á leiðinni þangað.

Sjómanninum var flogið til Álasunds í gær eftir að honum var bjargað. Hann fær svo áfallahjálp í dag. Mennirnir sem létust voru allir á sextugsaldri. Sá sem lifði var á fertugsaldri.