Öflugir háloftavindar valda flugfélögum vandræðum

Gífurlega öflugir háloftavindar yfir norðanverðu Atlantshafinu hafa valdið mörgum flugfélögum sem fljúga milli Evrópu og Bandaríkjanna miklum vandræðum.

Vindar þessir blása frá vestri til austurs í um 10 kílómetra hæð og eru sérlega öflugir um þessar mundir vegna veðurskilyrða, það er kulda við Grænland en hlýinda í Evrópu. Vindhraðinn í þeim getur náð allt að 400 kílómetrum á klukkustund.

Sökum þessa er flugtíminn frá Evrópu til Bandaríkjanna orðinn allt að 9 klukkustundir. Því hafa minni farþegaþotur oft þurft að millilenda á leiðinni til eldsneytistöku, annaðhvort á Grænlandi eða í Kanada.

Hina leiðina er svo mikill meðvindur þannig að sá flugtími hefur dottið niður í rúmar 6 klukkustundir. Það þýðir að flughraðinn á þeirri leið er orðinn yfir 1.000 kílómetrar á klukkustund. Í sumum tilvika hafa þoturnar flogið á nærri því hljóðhraða eða 1.200 kílómetra á klukkustund.

Flugfélögin hafa brugðist við þessu með því að fljúga norðar til að forðast þessa vinda og veldur þetta því aukinni flugumferð um íslenska flugstjórnarsvæðið.