Loftslagsbreytingar í Evrópu eru staðreynd

Umhverfisstofnun Evrópu segir í nýrri skýrslu að loftslagsbreytingar í Evrópu séu staðreynd. Síðasti áratugur hafi verið sá heitasti í álfunni síðan að veðurmælingar hófust.

Þessi hlýnun og afbrigðilegt veðurfar sem fylgt hefur henni hefur valdið gífurlegu tjóni í mörgum Evrópulöndum. Umhverfisstofnunin segir að það tjón muni aukast á næstu árum.

Í skýrslunni kemur fram að afbrigðilegt veðurfar hafi valdið skaða sem nam 9 milljörðum evra á níunda áratug síðustu aldar. Á fyrsta áratug þessarar aldar var tjónið hinsvegar 13 milljarðar evra eða yfir 2.100 milljarðar kr.

Umhverfisstofnun segir að það sé mjög áríðandi að þjóðir Evrópu og raunar heimsins alls geri allt hvað þær geta til að draga úr þessum loftslagsbreytingum.