Fjörutíu þúsund hafa fallið í Sýrlandi

Stjórnarhermönnum í Sýrlandi tókst ekki að berja aftur stórsókn uppreisnarmanna í bænum Mayadeen í nótt. Stjórnarandstæðingarnir hertóku bækistöð stjórnarhersins við bæinn og ráða nú yfir stórum landsvæðum í austurhluta Sýrlands.

Einnig hefur verið greint frá því að uppreisnarmennirnir hafi hertekið olíuríkt svæði, mitt á milli borgarinnar Deir Ezzor og landamæra Íraks.

Sýrlensk útlagasamtök, staðsett í Bretlandi, tilkynntu í dag að átökin í Sýrlandi hefðu kostað rúmlega 40 þúsund manns lífið. Hátt í 28 þúsund óbreyttir borgarar hafa fallið í átökunum. Rúmlega 10 þúsund hermenn, það er, uppreisnarmenn og stjórnarhermenn, hafa farist í átökunum.

Samtökin fá upplýsingar sínar frá andófsmönnum í Sýrlandi, læknum sem starfa á helstu sjúkrahúsum landsins og lögfræðingum.

Tölur samtakanna stangast á við mat Sameinuðu Þjóðanna sem gera ráð fyrir að um 20 þúsund manns hafi fallið í átökunum.

Stjórnarbyltingin gegn Bashar al-Assad, forseta Sýrlands, hófst í mars á síðasta ári.