Segir skattfrelsið leggja grunn að ESB elítu hér á landi

Þingmaður sjálfstæðisflokksins segir svonefnda IPA styrki Evrópusambandsins skapa ójöfnuð og leggja grunninn að ESB elítu á Íslandi. Málið var afgreitt úr efnahags og viðskiptanefnd í gær.

IPA styrkir eru styrkir úr sjóði ESB sem fjármagna aðstoð við umsóknarríki sambandsins. Samkvæmt frumvarpi sem nú liggur fyrir þinginu um innleiðingu styrkjanna fá ESB-verktakar aðflutningsgjöld felld niður við innflutning á vörum sem eru keyptar fyrir fjármagn samkvæmt ESB. Efnahags og viðskiptanefnd afgreiddi frumvarp sem innleiðir styrkina til annarrar umræðu á alþingi í gær, Guðlaugur Þór Þórðarson þingmaður sjálfstæðisflokksins situr í nefndinni.

„Það sem er þarna á ferðinni að það er verið að leggja grunninn að ákveðinni ESB elítu í landinu og þarna eiga þeir aðilar sem vinna fyrir ESB að vera með allt aðrar skattareglur en aðrir, reyndar ágætt skattfrelsi ef lögin ná fram að ganga," segir Guðlaugur Þór.

Í umsögnum um frumvarpið frá félagi löggiltra endurskoðenda segir að styrkirnir geti myndað ójöfnuð milli innfluttra vara og vara sem keyptar eru af íslenskum aðilum og mörg ákvæði séu fremur óskýr. Guðlaugur segir málið hafa verið afgreitt hratt og ekki farið yfir málefnalegar umsagnir, það sé bæði óskynsamlegt og óréttlætt að innleiða þetta í lög.

„Mér finnst þetta bera keim af því að það eigi bara að keyra þetta í gegn sama hvað er og það er búið að smala öllu stjórnarliðinu inn í þann bát," segir Guðlaugur svo.