Árangur undir öðrum kominn

„Vandamálið er ekki hvað ég get gert öðruvísi, heldur hvernig hinir ætla að hegða sér öðruvísi,“ segir Lakhdar Brahimi, nýr friðarerindreki Sameinuðu þjóðanna og Arababandalagsins í Sýrlandi.

Hann tekur við af Kofi Annan, fyrrverandi framkvæmdastjóra Sameinuðu þjóðanna, sem hætti nýverið þegar ljóst var orðið að árangur hefði enginn orðið. Brahmini, sem er fyrrverandi utanríkisráðherra Alsírs, segir að árangur ráðist fyrst og fremst af því hvort aðildarríki öryggisráðs Sameinuðu þjóðanna geti komið sér saman um afstöðu.

„Ef þau töluðu einni röddu og styddu greinilega það sem ég fer að gera fyrir þeirra hönd, þá er það það sem ég þarf,“ segir Brahmini. Rússland og Kína hafa ítrekað beitt neitunarvaldi sínu gegn ályktunum í öryggisráðinu um meiri þrýsting á sýrlensk stjórnvöld, sem hafa brugðist við af mikilli hörku gegn mótmælum og uppreisn í landinu.

Átökin hafa kostað yfir tuttugu þúsund manns lífið og hrakið hundruð þúsunda af heimilum sínum.- gb