Fellaini stal sviðsljósinu í sigri á Manchester United

Marouane Fellaini skoraði eina mark leiksins þegar Everton vann sanngjarnan 1-0 sigur á Manchester United í lokaleik fyrstu umferðar ensku úrvalsdeildarinnar í knattspyrnu á Goodison Park í kvöld.

Nýjasti liðsmaður United, Robin van Persie, byrjaði á bekknum en Sir Alex Ferguson ákvað að tefla fram Nani og Danny Welbeck hvor sínum megin við Wayne Rooney í framlínu United. Skemmst er frá því að segja að það virkaði ekki.

Heimamenn í Everton voru mun ákveðnari frá fyrstu mínútu og fengu bestu færin í fyrri hálfleik. David de Gea, besti leikmaður gestanna, varði með tilþrifum bæði frá Leon Osman af stuttu færi og aukaspyrnu Leighton Baines. Þá setti Fellaini boltann í stöngina af stuttu færi en markalaust var í leikhléi.

Síðari hálfleikur hófst á svipuðum nótum og þeim fyrri lauk. Leon Osman átti hörkuskot í slá eftir undirbúning Fellaini áður en heimamenn náðu forystunni. Fellaini skallaði þá boltann af krafti í netið eftir hornspyrnu en Michael Carrick, sem hafa átti gætur á Belganum stæðilega, leit illa út í markinu.

Carrick stóð vaktina í vörninni í fjarveru Rio Ferdinand. Ljóst er að það veikir varnarleik United til muna í föstum leikatriðum að hafa ekki tvo sterka skallamenn til þess að berjast um boltann í háloftunum.

Eftir markið féllu heimamenn langt aftur á völlinn og vörðust á síðasta þriðjungi vallarins. Phil Jagielka bjargaði á línu en annars var lítil hætta við mark heimamanna þrátt fyrir að gestirnir héldu boltanum lengst af.

Van Persie kom inná um miðjan hálfleikinn en komst aldrei í takt við leikinn. Færin voru af skornum skammti og fyrirgjafir höfnuðu ýmist á fyrsta varnarmanni, voru of háar eða fóru beint í fangið á Tim Howard í marki Everton.

Howard var einn þriggja fyrrverandi leikmanna United sem gátu fagnað sætum sigri á Goodison Park í kvöld. Danny Gibson og Phil Neville stóðu vaktina á miðjunni og leiðist væntanlega ekki í kvöld.

Það er áhyggjuefni fyrir Sir Alex Ferguson hve illa hans mönnum gekk að skapa sér færi í leiknum í kvöld. Shinji Kagawa komst ágætlega frá leiknum og lagði upp færi fyrir Danny Welbeck í fyrri hálfleik. Englendingnum voru þó mislagðir fætur líkt og kollegum hans í liði gestanna og var á endanum skipt af velli fyrir van Persie.

David Moyes, stjóri Everton, getur verið ánægður með sína menn sem eru ekki þekktir fyrir að hefja leiktíðir af krafti. Liðið tapaði aðeins tveimur af síðustu sextán leikjum sínum á síðustu leiktíð og hefur tímabilið á besta mögulega hátt.