Guðlaugur Victor með tilboð frá Nijmegen | Laus allra mála hjá Red Bulls

Guðlaugur Victor Pálsson losaði sig á dögunum undan samningi við bandaríska atvinnumannaliðið New York Red Bulls. Guðlaugur hefur leikið sem lánsmaður hjá NEC Nijmegen í efstu deild hollensku knattspyrnunnar undanfarnar vikur.

Guðlaugur Victor var gestur í Boltanum á x-inu 977 í dag. Þar sagði miðjumaðurinn að hann hefði losað sig undan samningi við bandaríska félagið.

„Ég átti fund með umboðsmanninum mínum og forráðamönnum í New York. Ég vildi losna. Þeir sögðu 'ekkert mál'. Þeir eru að fá leikmenn eins og Juninho þannig að þeir voru ekkert að hata það," sagði Guðlaugur Victor og hló.

„Ég er eiginlega á frjálsum markaði. Ég er með samningstilboð frá Nijmegen sem við erum að skoða og ég held ég verði þar. Mér líður mjög vel þar. Ég veit ekki hversu langur samningurinn verður. Þetta er allt saman á byrjunarstigi ennþá," segir Guðlaugur Victor sem heldur út til æfinga hjá hollenska liðinu 2. janúar.

Kappinn kann afar vel við lífið í Hollandi

„Ég held að ég hafi verið að spila mjög vel síðan ég kom þangað. Loksins er ferillinn minn að komast almennilega í gang eftir mörg félagaskipti. Loksins eru hlutirnir að ganga upp ef það má orða þetta þannig," segir Guðlaugur Victor og bætir við að þjálfari hans sé frábær og hafi trú á sér.

Fyrr í dag afhenti Guðlaugur Victor forsvarsmönnum Barnaspítala Hringsins 300 þúsund króna styrk. Upphæðinni safnaði Guðlaugur Victor með því að bjóða upp treyjur liðsfélaga sinna.

Hægt er að hlusta á viðtalið í heild sinni í spilaranum hér fyrir ofan.