Danir vildu heldur horfa á Matador en fótboltalandsliðið í beinni

Í ljós er komið að Danir vildu heldur horfa á margendursýnda sjónvarpsþáttaröð en hetjurnar sínar í danska landsliðinu í fótbolta í landsleik á móti Tékkum um síðustu helgi. Leikurinn endaði með jafntefli.

Um er að ræða sjónvarpsþættina Matador sem danska ríkissjónvarpið sýnir nú í sjöunda sinn frá því að þættirnir komu fyrst fyrir augu Dana árið 1978. Matador var sýndur á sama tíma og danska landsliðið í fótbolta var í beinni útsendingu á TV2 í fyrsta leik sínum í undankeppninni fyrir heimsmeistaramótið á þarnæsta ári.

Danir vildu heldur fylgjast með Mads Skjern. Misse Möghe og grisehandler Larsen en þeim Agger, Kjær og Cornelius. Raunar munar töluvert á áhorfendafjöldanum því tæplega 850.000 Danir horfðu á fótboltaleikinn en tæplega milljón þeirra fylgdust með lífinu í smábænum Korsbæk í Danmörku á millistríðsárunum á síðustu öld.

Matador er langvinsælasta sjónvarpsefni sem búið hefur verið til í Danmörku. Raunar setti Matador met í sjónvarpsáhorfi árið 1985. Met sem seint verður slegið þar sem um fyrstu endursýninguna var að ræða. Þá horfðu yfir 3,6 milljónir Dana á einn af þáttunum. Þetta telst eindæmi þar sem Danir voru um 5 milljónir talsins það ár.