Sérsveit kölluð út vegna dóma yfir Hells Angels í Kaupmannahöfn

Kalla þurfti út sérsveit Kaupmannahafnarlögreglunnar síðdegis í gær þegar þungir fangelsisdómar voru kveðnir upp yfir 14 meðlimum glæpasamtakanna Hells Angels.

Töluverður fjöldi félaga þeirra dæmdu voru mættir fyrir utan Östre Landsrett þegar dómarnir voru kveðnir upp. Þar voru líka til staðar útsendingarbílar frá danska ríkissjónvarpinu og TV2 enda átti að senda dómsuppkvaðninguna beint á báðum sjónvarpsstöðum þar sem um stærsta sakamál gegn meðlimum Hells Angels er ræða í Danmörku á síðustu árum.

Lítið varð þó úr útsendingum beggja stöðva því kapallinn að útsendingarbíl danska ríkissjónvarpsins var skorinn í sundur og skemmdarverk unnin á bíl TV2. Lögreglan náði svo að stilla til friðar.

Þeir Hells Angels meðlimir sem dæmdir voru í Östre Landsret fengu á milli þriggja og fimmtán ára fangelsisdóma fyrir morðtilraunir, líkamsárásir, ólöglega vopnaeign og nokkra aðra minniháttar glæpi.

Öll þessi mál tengjast gengjastríði í Kaupmannahöfn sem geisað hefur á milli Hells Angels og glæphópa nýbúa, einkum frá Miðausturlöndum, á undanförnum árum.