Danska stjórnin hættir við lög um bann við kaupum á vændi

Danska ríkisstjórnin hefur alfarið hætt við að setja lög sem banna kaup á vændi í Danmörku. Slík löggjöf er þegar til staðar í Svíþjóð, Noregi og á Íslandi.

Það var Morten Bödskov dómsmálaráðherra Danmerkur sem tilkynnti um þessa ákvörðun ríkisstjórnarinnar í morgun. Bödskov segir að helsta ástæðan fyrir því að hætt var við að banna kaup á vændi hefðu verið tilmæli frá Refsilagaráði Danmerkur.

Ráðið telur að bann við vændiskaupum myndi ekki draga úr umfangi vændis í Danmörku og aðeins hafa þau áhrif að gera aðstæður vændiskvenna enn verri en þær eru fyrir.

Þá segir Refsilagaráðið í umsögn sinni að reynsla Svía og Norðmanna, hvað bann við vændiskaupum varðar, er að erfitt sé að framfylgja löggjöfinni og því hafi hún ekki haft nein áhrif í þessum löndum.

Bödskov segir að í stað laga um bann við vændiskaupum muni ríkisstjórnin m.a. beita sér fyrir auknum aðgerðum til að koma í veg fyrir mansal í Danmörku.

Við þetta má bæta að stjórnarandstöðuflokkarnir í Noregi vilja að lög þar í landi um bann við vændiskaupum verði afturkölluð. Kannanir sýni að lögin hafi ekki dregið úr vændi heldur hafi vændiskonum þvert á móti farið fjölgandi, einkum í Osló. Þar að auki sýni rannsóknir að aðstæður vændiskvennanna hafa versnað að mun síðan lögin voru samþykkt.