Notar Facebook til að leita að morðingja

Lögreglan í Englandi vonast til þess að geta haft hendur í hári morðingja í gegnum Facebook.

Málið snýst um morðið á hinni 25 ára gömlu Jo Yeates í Bristol sem fannst látin á aðfangadag jóla eftir að hafa verið saknað í átta daga.

Lögreglan handtók leigusala Yeates vegna rannsóknarinnar en honum var síðan sleppt úr haldi.

Lögreglan hefur nú sett auglýsingu á Facebook þar sem óskað er eftir upplýsingum. Hingað til hefur hún fengið hátt í 300 vísbendingar í gegnum vefsíðuna.

Rannsóknarlögreglumaðurinn Phil Jones segir í samtali við BBC að með Facebook geti lögreglan beint notendum síðunnar inn á sinn vef með upplýsingar.