Ný spjaldtölva frá Barnes & Nobles

Bókaverslunin Barnes & Nobles kynnti í dag nýja spjaldtölvu. Tölvan er arftaki Nook-tölvunnar vinsælu en hún var gefin út árið 2009 og var í beinni samkeppni við lestrartölvu vefverslunarinnar Amazon - Kindle.

Nýja tölvan er kölluð lestrartölva af hönnuðum en hún er þó gædd eiginleikum sem setja hana á stall með iPad, spjaldtölvunni vinsælu frá Apple.

Nook hefur sjö tommu snertiskjá sem spilar myndbönd í háskerpu. Tölvan getur tengst þráðlausu interneti en styður þó ekki 3G. Nook spjaldtölvan kemur til með að kosta 249 dollara, eða tæpar þrjátíu þúsund íslenskar krónur.

Hægt verður að forpanta Nook frá og með 18. nóvember.