Útiloka kulda og flugelda sem orsök

„Þetta er alveg stórfurðulegt. Ég hef aldrei heyrt um svona lagað,“ segir Þór Jakobsson veðurfræðingur, sem hefur starfað við rannsóknir á sviði veðurfræði í hálfa öld. Veturinn hefur verið óvenju kaldur í Svíþjóð, þar sem 100 krákur drápust á þriðjudagskvöld, en þó segir Þór afar ólíklegt að fuglar drepist á þennan hátt vegna kulda eða annarra veðurhræringa. Hann man ekki eftir neinu á sínum ferli sem veðurfræðingur sem getur mögulega skýrt atvik síðustu daga í Svíþjóð og Bandaríkjunum.

Ólafur Nielsen, fuglafræðingur hjá Náttúrufræðistofnun, telur útilokað að heill hópur fugla hafi drepist á sama tíma vegna hræðslu við flugelda, en fyrstu tilgátur sérfræðinga í Arkansas á fugladauðanum voru á þá leið. Ólafur sagði í samtali við RÚV í gærdag að hann þekkti engin dæmi þess hér á landi að svo margir fuglar hefðu fyrirvaralaust fallið dauðir af himnum ofan.

Hann sagðist hafa lesið um atvik erlendis þar sem hópar af fuglum hefðu lent í vondum veðrum og drepist vegna þess, en engar vísbendingar eru um illviðri á þeim svæðum þar sem fuglarnir féllu niður.