Þingmaðurinn alvarlega særður

Gabrielle Giffords þingmaður demókrata frá Arizona í Bandaríkjunum er alvarlega særð á sjúkrahúsi eftir skotárás í gærkvöldi.

Giffords hafði boðað til samræðufundar við almenning við verslunarmiðstöð í Tucson í Arizona og var að ávarpa fundargesti þegar tuttugu og tveggja ára gamall maður gekk upp að henni og skaut hana í höfuðið.

Að því loknu hóf hann skothríð á mannfjöldan. Sex féllu í árásinni, þeirra á meðal alríkisdómari og níu ára gömul stúlka. Tólf særðust í árásinni. Skotið sem hæfði Giffords fór í gegnum höfuð hennar og heila.

Læknar eru þó bjartsýnir á að hún nái einhverjum bata. Hún hefur setið þrjú kjörtímabil á Bandaríkjaþingi.