Kveikt á Oslóar-trénu á sunnudaginn

Ljósin verða tendruð á Oslóar-jólatrénu á Austurvelli á sunnudaginn kemur. Nú eru sextíu ár liðin frá því íbúar Oslóar færðu Reykvíkingum fyrsta tréð en það hefur ævinlega verið sett upp á Austurvelli og kveikt á því við hátíðlega athöfn fyrsta sunnudag í aðventu. Engin undantekning verður á því í ár og kemur Gunnar Halle trompetleikari frá Noregi fram sem sérstakur gestur Aðventuhátíðar og leikur hann undir jólasöng Dómkirkjukórsins klukkan 16:00, að undangengnum jólatónlistarflutningi Lúðrasveitar Reykjavíkur sem hefst kl. 15.30.

„Þess má geta að Gunnar heldur kvöldið áður, laugardaginn 26. nóvember, aðventutónleika í Dómkirkjunni í Reykajvík kl. 18 ásamt píanóleikaranum Espen Eriksen. Er það norska sendiráðið á Íslandi sem hefur veg og vanda að komu þeirra hingað.   Það er Toril Berge, formaður borgarstjórnarflokks Venstre í Osló, sem færa mun borgarstjóra vorum Jóni Gnarr og Reykvíkingum  tréð að gjöf og verður það hin 8 ára gamla norsk-íslenska Sara Lilja Ingólfsdóttir Haug sem fær þann heiður að tendra ljósin á trénu,“ segir í tilkynningu frá Reykjavíkurborg.

Góðir gestir munu einnig birtast á sviðinu við Austurvöll. „Leikarinn Gunnar Eyjólfsson mun flytja kvæði um Leppalúða, Gói og Þröstur Leó mun flytja brot úr ævintýrinu um Eldfærin sem og úr Baunagrasinu sem frumsýnt verður í Borgarleikhúsinu í febrúar. Að lokum munu Stúfur, Gluggagægir og Hurðaskellir kíkja við en þeir hafa laumað sér í bæinn til að segja börnunum sögum og syngja jólalög.“

Tréð er flutt til landsins af Eimskip sem hefur séð um flutninginn frá upphafi borgarbúum að kostnaðarlausu. „Var tréð hoggið  við Finnerud í Nordmarka þann 11. nóvember s.l. og er rúmlega 12 metra hátt. Að venju verður það skreytt  fögrum ljósum en í fyrsta sinn mun jólastjarna nú einnig prýða topp þess. Grénitréð mun auk þess skarta jólaóróa Styrktarfélags lamaðra og fatlaðra og í ár er það Leppalúði sem horfir íbygginn milli greinanna.“