Tók 16 mánuði að úrskurða

Úrskurðarnefnd um upplýsingamál var nærri eitt og hálft ár að komast að niðurstöðu vegna kæru Fréttablaðsins. Menntamálaráðuneytinu ber að afhenda gögn um deilu starfsmanna Iðnskólans í Hafnarfirði.

Það tók úrskurðarnefnd um upplýsingarmál nærri eitt og hálft ár að fella úrskurð vegna kæru blaðamanns Fréttablaðsins eftir að menntamálaráðuneytið neitaði að afhenda gögn á grundvelli upplýsingalaga.

„Þetta er óhæfilega langur málsmeðferðartími, ég dreg enga dul á það,“ segir Trausti Fannar Valsson, formaður úrskurðarnefndarinnar. Hann segir eðlilegan málsmeðferðartíma hjá nefndinni þegar allt gangi vel eiga að vera frá einum og hálfum mánuði að þremur mánuðum.

Fréttablaðið óskaði í lok júlí 2010 eftir gögnum frá mennta- og menningarmálaráðuneytinu sem vörðuðu deilu kennara og skólameistara Iðnskólans í Hafnarfirði. Ráðuneytið neitaði að afhenda gögnin, og var synjunin kærð til úrskurðarnefndar um upplýsingamál í lok ágúst það sama ár.

Úrskurðarnefndin hefur nú komist að þeirri niðurstöðu að ráðuneytinu beri að afhenda stóran hluta þeirra gagna sem beðið var um, og tengjast deilu tveggja kennara við skólameistarann.

Úrskurðurinn kemur hins vegar heldur seint þar sem skólameistarinn sagði í millitíðinni öðrum kennaranum upp störfum, og lét svo sjálfur af störfum um síðustu áramót, eins og Fréttablaðið fjallaði um á síðasta ári.

Trausti segir að af ýmsum orsökum hafi safnast upp talsverður hali af málum hjá úrskurðarnefndinni, sem nú sé að takast að greiða úr að mestu. Það mál sem hér sé fjallað um sé eitt af þeim sem hafi tekið hvað lengstan tíma að úrskurða um. Þó séu dæmi um mál sem hafi tekið enn lengri tíma.

„Það eru engar beinar skýringar á þessu, aðrar en þær að við höfum ekki haft mannafla eða aðstöðu til að klára málin hraðar. Það eru í sjálfu sér ekki afsakanir miðað við hvernig lögin eru,“ segir Trausti.

Hann segir nefndina hafa fengið fleiri og umfangsmeiri mál á síðustu tveimur árum en tíðkast hafi fyrir það. Nefndin þurfi að fara yfir stóra gagnabunka í mörgum málum, sem taki tíma.

Trausti bendir einnig á að ákveðin verkefni hafi bæst á nefndina, til dæmis með setningu laga um upplýsingarétt um umhverfismál. Þá fjalli nefndin um mál sem varða aðgengi að gögnum rannsóknarnefndar Alþingis vegna bankahrunsins sem séu oft afar umfangsmikil.

Trausti er lektor í stjórnsýslurétti við Háskóla Íslands, og hann segir að í gegnum það starf verði hann var við að málsmeðferðartími hjá hinu opinbera sé almennt að lengjast. Stjórnsýslan standi nú frammi fyrir þeirri áskorun að halda málsmeðferðarhraðanum í lagi þrátt fyrir minna fjármagn.

brjann@frettabladid.is