Aston Villa og Sunderland stórgræddu á lokadeginum

Eiríkur Stefán Ásgeirsson skrifar 24. maí 2011 06:00

Boudewijn Zenden skoraði eitt og lagði upp annað í 3-0 sigri Sunderland á West Ham um helgina. Sigurinn reyndist dýrmætur en þetta var síðasti leikur Zendens með Sunderland. Nordic Photos / Getty Images

Gjaldkerar Aston Villa og Sunderland hafa væntanlega brosað allan hringinn þegar þeir sáu lokastöðuna í ensku úrvalsdeildinni eftir lokaumferðina á sunnudaginn. Bæði lið unnu sína leiki og hoppuðu fyrir vikið upp um fjögur sæti. Það skiptir heilmiklu máli þegar kemur að úthlutun vinningsfjár í deildinni.

Aston Villa og Sunderland fá bæði 576 milljónum króna meira í sinn hlut ef mið er tekið af stöðu liðanna fyrir lokaumferðina. Aston Villa endaði í níunda sæti og Sunderland því tíunda og munar heilmiklu um það eins og sjá má í meðfylgjandi töflu.

En að sama skapi þurftu tvö lið að gjalda fyrir þetta. Stoke og Bolton töpuðu bæði í lokaumferðinni og féllu um fjögur sæti í stigatöflunni. Þau urðu því af áðurnefndum upphæðum.

Stoke tapaði einmitt fyrir Wigan sem bjargaði þar með sæti sínu í ensku úrvalsdeildinni og hoppaði upp um þrjú sæti. Þar með græddi liðið 429 milljónir sem er auðvitað smámunir miðað við það sem félagið fær fyrir það eitt að halda sæti sínu í deild þeirra bestu.

Sjónvarpstekjum er nefnilega skipt jafnt á milli liðanna sem leika í deildinni og í ár fær hvert lið sex milljarða króna í sinn hlut.

Þetta er þó aðeins grunnupphæðin. Þau lið sem eiga flesta leiki í beinni sjónvarpsútsendingu fá meira og fá því stærstu liðin meira í sinn hlut en þau minni þegar upp er staðið.

Sætaskipti í lokaumferð ensku úrvalsdeildarinnar1. Manchester United - (óbreytt) - 2.860 milljónir króna

2. Chelsea - (óbreytt) - 2.717

3. Manchester City - (óbreytt) - 2.574

4. Arsenal - (óbreytt) - 2.431

5. Tottenham - (óbreytt) - 2.288

6. Liverpool - (óbreytt) - 2.145

7. Everton - (óbreytt) - 2.002

8. Fulham - (óbreytt) -1.859

9. Aston Villa - (upp um 4 sæti, +572 miljónir kr) - 1.716

10. Sunderland - (upp um 4 sæti, +572 miljónir kr.) -1.573

11. West Bromwich Albion - (óbreytt) - 1.430

12. Newcastle - (óbreytt) - 1.287

13. Stoke City - (niður um 4 sæti, -572 miljónir kr.) - 1.144

14. Bolton - (niður um 4 sæti, -572 miljónir kr.) - 1.001

15. Blackburn - (óbreytt) - 858

16. Wigan- (upp um 3 sæti, +429 miljónir kr.) - 715

17. Wolverhampton Wolves - (niður um 1 sæti, -143 milljónir kr.) - 572

18. Birmingham - (niður um 1 sæti, -143 milljónir kr.) - 429

19. Blackpool - (niður um 1 sæti, -143 milljónir kr.) - 286

20. West Ham - (óbreytt) - 143

Mest lesið

Fleiri fréttir