Gaddafi berst við að halda völdum

Muammar Gaddafi leiðtogi Líbíu berst nú við að halda völdum í höfuðborginni Trípólí og á stórum svæðum í vesturhluta landsins en uppreisnarmenn eru sagðir hafa austurhlutann á valdi sínu að mestu.

Stór hluti höfuðborgarinnar er mannlaus að því er fram kemur á fréttavef BBC og sveitir hliðhollar Gaddafi fara þungvopnaðar um göturnar. Að minnsta kosti 300 manns eru látnir í átökum síðustu daga og þúsundir útlendinga hafa flúið landið. Andófsmenn í vesturhlutanum vonast nú til þess að fólk úr austurhlutanum komi þeim til aðstoðar en þar á meðal eru sagðir fjölmargir hermenn sem gerst hafa liðhlaupar.