Hóta verkfalli á brúðkaupsdaginn

Stjórnendur neðarnjarðarlesta í Lundúnum hafa hótað því að fara í verkfall á brúðkaupsdegi þeirra Vilhjálms prins og Kate Middleton. Þau gifta sig 29. apríl næstkomandi. Það er frídagur og verkfallið mun því ekki hafa áhrif á þá sem nota lestarnar til að komast til og frá vinnu.

Hinsvegar er búist við að hundruð þúsunda manna leggi leið sína til Lundúna til að fylgjast með brúðkaupinu. Þeirra ferðaáætlanir væru þá í uppnámi. Lestarstjórarir eiga í deilum um stórhátíðaálag sitt og fóru af þeim sökum í verkfall 26. desember síðastliðinn. Það er hinn frægi útsöludagur á annan í jólum sem Bretar kalla Boxing Day.