Umfjöllun: FH missti niður 2-0 forystu í jafntefli á móti Fylki

FH-ingar tóku á móti Fylkismönnum í elleftu umferð Pepsí deildar karla í gærkvöldi . Fyrir fram var búist við jöfnum og spennandi leik þar sem aðeins 1 stig skildi liðin að í töflunni. Spennan var svo sannarlega til staðar og þegar upp var staðið sættust liðin á skiptan hlut í 2-2 jafntefli. Leikurinn var ótrúlega kaflaskiptur og má segja að sá fyrri hafi verið eign heimamanna en í þeim síðari tóku gestirnir völdin.

FH-ingar náðu forystunni strax á elleftu mínútu og var þar að verki Hólmar Örn Rúnarsson með skalla eftir fyrirgöf Björn Sverrissonar frá vinstri kanti . Áfram héldu FH-ingar og juku þeir forskot sitt í 2-0 á 17. mínútu þegar Davíð Ásbjörnsson Fylkismaður skallaði hornspyrnu Ólafs Páls Snorrasonar í netið. Staðan 2-0 og allt virtist stefna í þægilegan FH sigur.

Fyrri hálfleikur leið áfram nokkuð tíðindalaus eftir seinna mark heimamanna. Það markverðasta var ef til vill sú staðreynd að þjálfarar liðanna þurftu að gera þrjár skiptingar og það allt vegna meiðsla.

Eitthvað hefur Ólafur Þórðarsson þjálfari Fylkismanna sagt við sína menn í leikhlénu því þeir appelsínugulu umbreyttust úr andlausu og slöku liði yfir í hungrað og sóknarsinnað lið. FH-ingar hinsvegar virtust detta niður um gír og misstu tökin á leiknum. Loks á 69. mínútu minnkuðu Fylkismenn muninn og var þar að verki Albert Brynjar Ingason með skoti af stuttu færi eftir skallasendingu Kjartans Breiðdals.

Við markið efldust Fylkismenn enn meira og það kom því engum á óvart þegar Kjartan Breiðdal jafnaði leikinn á 73. mínútu. Andrés Jóhannesson átti þá aukaspyrnu sem fór í varnarvegg FH-inga, Ingimundur Níels tók frákastið og skaut í varnarmann og loks var það Kjartan esm endaði skothríðina með skoti sem söng í netinu. Staðan 2-2 og umskiptin í leiknum ótrúleg.

Það sem eftir lifði leiks áttu Fylkismenn hættulegri færi og hefðu með smá heppni getað stolið öllum þremur stigunum. Jafntefli var þó niðurstaðan í tvískiptum leik.

FH-ingar geta verið sáttir að einhverju leyti. Þeir refsuðu sofandi Fylkismönnum í fyrri hálfleik en það hlýtur að vera áhyggjuefni fyrir Heimi Guðjónsson þjálfara FH að þurfa horfa upp á sína menn missa unnin leik niður á þennan hátt.

Fylkismenn geta að sama skapi verið ánægðir með að þá baráttu og eljusemi sem liðið sýndi í seinni hálfleik. Það er vonandi fyrir Fylkismenn að þeir bjóði oftar upp á frammistöðuna eins og hún var í seinni hálfleik frekar en þeim fyrri. FH-ingar eru eftir leikinn í 5. sæti með 16 stig og Fylkismenn 7. sæti með 15 stig.

FH 2-2 FylkirSkot (á mark): 9–10 (4-3)

Varin skot: Gunnleifur 1 – Bjarni - Fjalar 1 - 1

Hornspyrnur: 5–2

Aukaspyrnur fengnar: 8–17

Rangstöður: 2–2

Dómari: Erlendur Eiríksson (8)