Darren Bent: Við vörðumst vel eftir markið

Darren Bent fékk draumabyrjun í búningi Aston Villa því hann skoraði eina mark leiksins þegar Aston Villa vann 1-0 sigur á Manchester City í ensku úrvalsdeildinni í kvöld. Bent varð dýrasti leikmaður félagsins fyrir aðeins fjórum dögum.

„Það er alltaf sagt að fyrsta markið sé mikilvægt og við náðum að skora snemma. Við vörðumst síðan vel eftir það og spiluðum mjög vel," sagði Darren Bent, hetja Aston Villa í kvöld, í viðtali við ESPN.

Þetta var í annað skiptið á tímabilinu sem lið Bent vinna lærisveina Roberto Mancini 1-0 með sigurmarki frá honum. Bent tryggði Sunderland 1-0 sigur á City úr víti í ágústmánuði.

„Þetta er búin að vera erfið vika en hún endaði frábærlega því við vorum að vinna eitt besta liðið í landinu," sagði Darren Bent.