Enski boltinn

Richards vill fara frá City

Eiríkur Stefán Ásgeirsson skrifar
Micah Richards, leikmaður Manchester City.
Micah Richards, leikmaður Manchester City. Nordic Photos / Getty Images
Micah Richards er orðinn leiður á því að fá að spila lítið hjá Manchester City og vill fara frá félaginu.

Richards er 22 ára gamall varnarmaður sem sló í gegn sem táningur. Hann komst meira að segja í enska landsliðið.

Hins vegar hefur honum ekki gengið mjög vel undanfarin ár og hefur misst sæti sitt bæði í byrjunarliði City og landsliðinu.

Það hefur ekki breyst á núverandi tímabili og hefur Richards ekki verið fastamaður í liðinu síðan í upphafi tímabilsins en þá hélt hann sæti sínu í byrjunarliðinu í fyrstu fimm umferðunum.

„Ég veit að fólk á eftir að lesa þetta og velta fyrir sér hvers vegan í ósköpunum ég steinhaldi ekki bara kjafti," sagði Richards í samtali við enska fjölmiðla.

„City er í öðru sæti og því hlýtur stjórinn að hafa rétt fyrir sér. Það sem hann hefur verið að gera er að virka. En ég veit hvað ég get og ég vil fá tækifæri til að sýna það."

„Ég er ekki sú tegund af leikmanni sem sættir sig við það að sitja bara á bekknum og þiggja laun fyrir það. Mér líkar alls ekki illa við Roberto Mancini eða félagið sjálft. Stjórinn veit alveg hvernig mér líður."

„Hann sagði mér að ég væri enn í hans framtíðaráætlunum en þá komu þrír leikir í röð þar sem ég kom ekkert við sögu."

„Stundum er ég í liðinu en svo kemur Jerome Boateng inn í minn stað. Eða Pablo Zabaleta. Eða þá að við tveir spilum saman. Þetta er allt í þessum dúr og sífellt verið að breyta til."

„Ég skildi það vel þegar ég komst ekki í liðið þegar að Mark Hughes var að stýra því. Þá var ég ekki að spila vel. En ég lagði mikið á mig í sumar og finnst að ég hafi verið að spila vel í haust. Ég hef trú á sjálfum mér og veit hvenær ég er í góðu formi - sem er einmitt núna."

„Við erum með fáránlega marga leikmenn og það eru margir ótrúlega góðir sem komast ekki einu sinni að. Það er 21 leikmaður sem fer í hvern einasta leik og þrír þeirra komast ekki á bekkinn. Ég vona að félagið skilji að þeir verði að leyfa sumum leikmönnum að fara. Annars munu þeir einfaldlega rotna."




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.