Femínistar gagnrýna VG

Það er ekki í anda fæðingarorlofslaga að víkja Guðfríði Lilju Grétarsdóttur úr embætti þingflokksformanns þegar hún koma til baka úr fæðingarorlofi og hlýtur að vera á skjön við stefnu Vinstri grænna í jafnréttismálum, segir í ályktun Femínistafélags Íslands.

Þar segir einnig að þessi ákvörðun grafi undan hugmyndum um jafnrétti og kvenfrelsi, sem liggi að baki fæðingarorlofslögum.

Stjórn Landssambands framsóknarkvenna tekur í svipaðan streng og segir að það veki furðu að stjórnmálaafl, sem sýnt hafi sig sem einn helsta talsmann raunverulegs jafnréttis, skuli ekki ástunda þau vinnubrögð sem það boðar.