Játaðu, illi hrægammur

Hrægammur hefur verið handtekinn í Saudi-Arabíu grunaður um njósnir fyrir Ísrael. Gammurinn fannst úti í sveit í Saudi-Arabíu og það þýddi lítið fyrir hann að neita sekt. Á öðrum fæti hans var nefnilega senditæki merkt „Tel Aviv University." Þetta vakti upp storm á arabiskum spjallrásum. Þar voru menn vissir um að Síonistar hefðu þjálfað fuglinn til njósna.

Hafa líka notað hákarla

Þetta er reyndar ekki í fyrsta skipti sem Ísraelar fara í samkrull við dýraríkið til þess að klekkja á Aröbum. Fyrir jól réðist hákarl á fjóra erlenda ferðamenn sem voru á sundi við ferðamannabæinn Sharm el Sheik í Egyptalandi. Fylkisstjórinn á Sinai skaga, Mohamed Abdel Fadil Shousa, sagði þá í samtali við breska blaðið The Sun að það væri alls ekki útilokað að Ísraelar hefðu fleygt hákarlinum í hafið þarna til þess að skaða ferðaþjónustuna í Egyptalandi. Það þyrfti bara tíma til að sanna það.