Afrit af yfirheyrslum kviðdóms yfir Nixon gerðar opinberar

Þjóðskjalasafn Bandaríkjanna hefur gert opinbert afrit af yfirheyrslu sérstaks kviðdóms yfir Richard Nixon þáverandi forseta Bandaríkjanna nokkru áður en hann hrökklaðist frá völdum vegna Watergate hneykslisins árið 1974.

Nixon sór og sárt við lagði í yfirheyrslum þessum að 18 og hálf mínúta af upptökum af samtali hans og starfsmannastjóra síns í upphafi Watergate hneykslisins hafi verið þurrkuð út fyrir slysni og að hann hafi ærst af reiði þegar það kom í ljós.

Mikið var rætt um þessa upptöku á sínum tíma og talið að Nixon hefði fyrirskipað ritara sínum að þurrka hana út vegna þess hve skaðlegt innihald hennar væri fyrir forsetann.