Ekkja Gaddafis lofar gulli og grænum skógum í Nígeríubréfi

Nýtt svokallað Nígeríubréf kemur nú í tölvupósti til fjölda fólks á Norðurlöndunum. Í bréfinu lofar Safia Farkash ekkja Muammar Gaddafi viðtakenda þess gulli og grænum skógum ef hann aðstoðar ekkjuna við að koma auðæfum hennar í lóg.

Talið er að ekkjan hafi náð að koma um 30 milljörðum dollara undan, þar á meðal 20 tonnum af gulli, þegar hún flúði frá Líbíu til Alsír í ágúst síðastliðnum. Í Alsír fékk ekkjan svo landvistarleyfi af mannúðarástæðum eins og það var orðað.

Sérfræðingar hjá tölvuöryggisfyrirtækinu WeCloud segja að menn ættu að hugsa sig tvisvar um áður en þeir svari bréfinu. Það sé nefnilega sent frá netþjóni í Ástralíu en ekki Alsír.