Ráðherra segir mikilvægt að vernda íslenska lambakjötsframleiðslu

Landbúnaðarráðherra segir innflutningskvóta á lambakjöti ekki boðna út vegna þess að mikilvægt sé að standa vörð um íslenska lambakjötsframleiðslu. Hann telji engan vilja stefna þessari grunnframleiðslu í landinu í hættu.

Sjávarútvegs- og landbúnaðarráðherra segir nægar birgðir til af lambakjöti í landinu fram að haustslátrun og því sé engin þörf á að flytja inn lambakjöt eins og alþjóðlegir samningar geri ráð fyrir.

„Það eru boðnir út kvótar á ýmsum vörum. En við bjóðum ekki út kvóta á lambakjöti. Það er alveg hárrétt af því að þetta er grundvallarframleiðsla hér. Það er mjög mikilvægt að við stöndum vörð um íslenska lambakjötsframleiðslu og fæðuöryggið þar; matvælavinnsluna. Og ég bara spyr, er einhver sem vill stefna því í hættu, íslenskum landbúnaði og íslenskri dilkakjötsframleiðslu? Nei," segir Jón Bjarnason sjávarútvegs- og landbúnaðarráðherra.

Hins vegar sé ánægjuefni hvað fáist gott verð fyrir íslenskt dilkakjöt á erlendum mörkuðum og fagnaðarefni hvað útflutningur hafi gengið vel. Sem sýni að Íslendingar geti enn aukið framleiðslu á dilkakjöti, sauðfjárbændum og þjóðinni til hagsbóta.

- En er það ekki í besta falli tvískinnungur og jafnvel hræsni að okkur þyki gott að geta flutt okkar lambakjöt út nokkurn veginn óhindrað en reisum síðan háa tollamúra og hindranir hér á Íslandi fyrir því að lambakjöt sé flutt til Íslands?

„Mér finnst bara að við stöndum vörð um okkar lambakjötsframleiðslu. Og það held ég að sé stefna og vilji þjóðarinnar," segir Jón.

Með innflutningi skapist hætta á smitsjúkdómum sem geti t.d borist í sauðfé. „Við hugsum um þjóðarhag og það gerum við í þessum efnum," segir ráðherrann.

- En ég spyr þá aftur, er það ekki tvískinnungur að við viljum flytja nokkurn veginn óhindrað út okkar afurðir en lokum nánast fyrir innflutning á sams konar afurðum frá öðrum löndum?

„Ég sé ekki neinn sérstakan tvískinnung í því varðandi lambakjötið. Þetta eru samningar sem hafa verið í gildi um útflutning á lambakjöti. Og það er fagnaðarefni að það skuli fást gott verð fyrir það. En markaðurinn hér á Íslandi er ekki stór og við þurfum þá líka að standa vörð um innanlandsframleiðsluna og neysluna. Og það gerum við með þessum hætti," segir Jón Bjarnason.

Efnahags- og viðskiptaráðherra segir hins vegar nauðsynlegt að auka samkeppni í öllum greinum samfélagsins. Mikilvægt sé að almenn samkeppnislöggjöf gildi um framgöngu t.d. afurðastöðva í búvörugreinum.

„Til þess að tryggja einmitt að það verði þá eðlilegt verðmyndunarkerfi, og neytendur njóti ávinningsins af því ef það er að koma betra verð á erlendum mörkuðum," segir Árni Páll Árnason efnahags- og viðskiptaráðherra.