Kvartað undan landbúnaðarráðherra til umboðsmanns

Miðalda viðskiptahættir með lambakjöt munu leiða til umtalsverðra verðhækkana á næstu mánuðum að mati Samtaka verslunar og þjónustu. Á sama tíma og skortur sé á lambakjöti komi landbúnaðarráðherra í veg fyrir innflutning.

Tvennum sögum fer af því hvort nægar lamakjötsbirgðir séu til í landinu. Hins vegar er ljóst að Íslendingar flytja óhindrað út mikið magn af lambakjöti en nánast ógjörningur er að flytja það inn. Nú hafa Samtök verslunar og þjónustu kvartað undan þessu til Umboðsmanns Alþingis.

Samtökin benda á í kvörtun til umboðsmanns að sjávarútvegs- og landbúnaðarráðuneytið hafi ekki auglýst innflutningskvóta á 354 tonnum af lambakjöti og ekki heldur á eggjum. Með þessu hafi ráðherra ekki sinnt laga- og samningsskyldu en umræddur innflutningur skipti íslenska verslun og neytendur miklu máli enda leiði innflutningur til aukinnar samkeppni og meira vöruúrvals.

„Við eigum enga úrkosti aðra gagnvart svona galinni stjórnsýslu en skjóta svona máli til Umboðsmanns Alþingis og það höfum við gert. Og ég held að þetta sé þriðja ef ekki fjórða málið sem við erum akkúrat með í gangi núna vegna stjórnsýslu núverandi sjávarútvegs- og landbúnaðarráðherra," segir Andrés Magnússon, framkvæmdastjóri Samtaka verslunar og þjónustu.

Landbúnaðarráðherra og afurðastöðvar fullyrða að nóg sé til af lambakjöti í landinu, eða um þúsund tonn, sem verða að duga fram að slátrun í haust. En um 40 prósent af lambakjötsframleiðslunni er flutt út.

„Þær upplýsingar sem ég hef fengið núna í dag og í gær eru þess eðlis að afurðarstöðvarnar geti ekki afhent lambakjöt. Og það er mjög undarlegt í ljósi þess að þær upplýsingar sem við fáuum úr landbúnaðarráðuneytinu segja að það séu um þúsund tonn af lambakjöti til í landinu," segir Andrés.

Hvað sem rétt sé í þessu efni segir í bréfi Samtaka verslunar og þjónustu til ráðherra í dag að þessi staða sé með öllu óásættanleg fyrir verslunina og neytendur. Og þess er krafist að almennt viðskiptafrelsi verði innleitt með þessa vöru og þá án ofurtolla, eins og ráðherra geti heimilað ef viljinn væri fyrir hendi.

„Þetta er náttúrlega bara miðalda fyrirkomulag sem gildir með viðskipti með þessa vöru og ef ekki verður breyting á sjáuum við ekki annað en verð á þessari vöru og ýmsum öðrum búvörum muni stórhækka á næstunni. Seinni hluta þessa árs skulum við segja. Og það eru bara neytendur sem bera skaðan af og enginn annar," segir framkvæmdastjóri Samtaka verslunar og þjónustu.