Cain mun ekki hætta við framboð

Forsetaframbjóðandinn Herman Cain segist ekki ætla að hætta við framboð sitt eftir að nokkrar konur stigu fram og lýstu óviðeigandi hegðun hans.

Konurnar störfuðu allar fyrir Bandaríska Veitingastaðasambandið en Cain var stjórnandi þess. Meint áreiti á að hafa átt sér stað á síðasta áratugi.

Cain segist ekkert kannast við konurnar og að það sé algjörlega útilokað hann muni hætta við framboð sitt. Hann sagði framboð sitt ekki vera fyrir sjálfan sig, heldur fyrir alla Bandaríkjamenn.

Cain segist vera reiðubúinn að gangast undir lygamælapróf til að sanna sakleysi sitt.