Vítaspyrnudómur bjargaði Chelsea - Drogba sleginn í rot

Chelsea vann 3-1 sigur á nýliðum Norwich á heimavelli í dag. Didier Drogba, leikmaður Chelsea, var borinn meðvitundarlaus eftir að hafa verið óviljandi sleginn í rot af markverði Norwich.

Leikurinn var í járnum lengi vel en Frank Lampard kom sínum mönnum í 2-1 forystu á 82. mínútu eftir að Ramires hafði krækt í vítaspyrnu og um leið fiskað markvörðinn John Ruddy af velli með rautt spjald.

Spánverjinn Juan Mata lék sinn fyrsta leik fyrir Chelsea í dag og hélt upp á það með því að skora þriðja mark Chelsea á 101. mínútu en mikil töf varð á leiknum vegna meiðsla Drogba. Jose Bosingwa skoraði fyrsta mark Chelsea en Grant Holt fyrir gestina.

Annað mark Chelsea kom eftir skyndisókn. Mata, sem var þá nýkominn inn á, vann boltann í eigin vítateig og gaf á Frank Lampard, sem framlengdi á Ramires sem var reyndar hársbreidd frá því að missa boltann of langt frá sér.

Ramires náði að pota í boltann áður en hann var tekinn niður af Ruddy. Vítaspyrna dæmd og rautt spjald á loft. Endursýningar í sjónvarpi sýndu reyndar að lítil snerting átti sér stað en dómurinn engu að síður réttur.

Chelsea byrjaði mjög vel í leiknum og Jose Bosingwa kom þeim bláklæddu yfir með þrumuskoti strax á sjöttu mínútu. Það var því allt útlit fyrir nokkuð auðveldan leik hjá heimamönnum en annað átti eftir að koma á daginn.

Paul Lambert, stjóri Norwich, byrjaði með fimm manna varnarlínu með þrjá miðverði og vængbakverði sem virtist lítinn árangur bera. Lambert breytti svo í 4-4-2 þegar að einn miðvarðanna, Zach Whitbread, fór meiddur af velli um miðbik fyrri hálfleiks, og setti hann Anthony Pilkington inn á miðjuna í hans stað.

Við það náði Norwich miklu betri tökum á leiknum og átti oft hættulegar sóknir að marki Chelsea. Sóknarþunginn bar svo árangur á 63. mínútu þegar að Grant Holt jafnaði metin fyrir Norwich eftir skelfilegt úthlaup Hilario í markinu.

Norwich hélt svo áfram að sækja eftir þetta þar til að Chelsea náði aftur yfirhöndinni í leiknum. Manni færri náðu gestirnir gulklæddu sér ekki á strik.

Branislav Ivanovic fékk svo tækifæri til að innsigla sigurinn er hann skallaði framhjá af mjög stuttu færi eftir sendingu Frank Lampard. Það gerðist á 90. mínútu en tíu mínútum síðar náði Mata að koma Chelsea í 3-1 forystu með laglegu skoti eftir mistök í varnarleik Norwich.

Didier Drogba meiddist illa í leiknum er hann fékk þungt höfuðhögg frá Ruddy, markverði Norwich. Hann steinrotaðist og var gert að honum í um sjö mínútur þar til hann var borinn af velli - meðvitundarlaus.

Belginn Romelu Lukaku lék einnig sinn fyrsta leik fyrir Chelsea í dag. Lukaku kom inn á fyrir Fernando Torres sem náði sér alls ekki á strik að þessu sinni.