Ryan Giggs er til í eitt ár til viðbótar

Ryan Giggs er orðinn 37 ára gamall og búinn að vinna allt með Manchester United en hann er ekkert á því að fara að leggja skóna á hilluna. Giggs hefur nú gefið það út að hann hafi áhuga á því að spila eitt tímabil til viðbótar.

Samningur Ryan Giggs og Manchester United er endurskoðaður eftir hvert tímabil og það bjuggust margir við því að hann væri núna á sínu síðasta tímabili. Giggs lék sinn 600. deildarleik með United á dögunum.

„Ég er ánægður með að vera enn að spila og ég er að njóta fótboltans alveg eins mikið og áður. Ég hef alltaf sagt að á meðan ég hef gaman af boltanum þá mun ég halda áfram að spila. Við munum samt sem áður setjast niður og ræða málin en ég er spenntur fyrir því að spila næsta tímabil líka," sagði Ryan Giggs.

Giggs segir að Ferguson myndi láta hann strax vita ef að hann væri ekki að standa sig inn á vellinum. „Hann væri sá fyrsti til að segja mér ef ég spilaði ekki vel eða að formið mitt væri ekki nógu gott. Við tölum meira saman í dag en við gerðum áður og við erum alltaf mjög hreinskilnir. Hann lætur mig alltaf vita hvenær ég spila og hvenær ég spila ekki. Ég veit því meira um stöðu mína í dag," segir Giggs.

Giggs hefur unnið 31 titil með Manchester United á ferlinum en hann lék sinn fyrsta leik fyrir félagið árið 1991 og er því á sínu 21. tímabilið með félaginu. Giggs hefur ellefu sinnum orðið enskur meistari og er búinn að vinna enska bikarinn fjórum sinnum.