Antonio Valencia gæti snúið aftur í lok febrúar

Antonio Valencia meiddist illa á ökkla í Meistaradeildarleik á móti Rangers í september en endurhæfingin hefur gengið vel og nú vonast Manchester United menn að hann geti farið að spila á nýjan leik í lok febrúar.

„Það gengur vel hjá Valenica og hann er byrjaður að hlaupa. Hann getur núna æft á hverjum degi sem er stórt skref í rétta átt," sagði Sir Alex Ferguson, stjóri Manchester United, á blaðamannafundi.

„Hann hefur fengið grænt ljós frá læknunum en við fylgjumst vel með þróun mála hjá honum. Ég held að það gæti verið möguleiki að hann fari að spila á ný í lok febrúar. Það væri vítamínssprauta í okkar lið að fá hann aftur inn," sagði Ferguson.

Manchester United er í efsta sæti með 45 stig alveg eins og nágrannar þeirra í Manchester City en eiga tvo leiki inni. United mætir Birmingham City á Old Trafford á morgun.