Búið að fresta leik Breiðabliks og KR - fleiri leikir í hættu

KSÍ staðfesti nú rétt fyrir hádegi að búið sé að fresta leik Breiðabliks og KR sem átti að fara fram á Kópavogsvelli í kvöld. Leikurinn hefur verið færður fram á þriðjudag.

Birkir Sveinsson, mótastjóri KSÍ, sagði við Vísi að það hefði ekkert annað verið í stöðunni en að fresta leiknum.

"Völlurinn er ekki í leikhæfu ástandi. Það er 20 sentimetra snjór yfir honum öllum og grasið mjög blautt," sagði Birkir og en hann segir að það hefði ekki breytt neinu að moka völlinn.

Leikir Víkings og Þórs sem og Vals og FH á morgun eru í hættu enda þeir vellir líka á kafi í snjó.

"Við munum byrja að skoða þá velli í dag en ekki verður tekin nein ákvörðun um þá fyrr en á morgun," sagði Birkir.

Ástandið í Keflavík og Vestmannaeyjum er þó gott enda er þessi snjókoma staðbundin við höfuðborgarsvæðið. Pepsi-deild karla mun því hefjast með leik ÍBV og Fram á morgun en sá leikur hefst klukkan 18.00.